WACHEZAJI KOREA KUSINI KUKWEPA KWENDA JESHINI KAMA WAKIIFUNGA JAPAN.

Wachezaji wa soka wa timu ya taifa ya Korea Kusini wameongezewa motisha ya kutolitumikia jeshi la nchi hiyo kama watafanikiwa kuwafunga wapinzani wao Japan na kunyakuwa medali ya shaba katika michuano ya olimpiki. Hatua hiyo ni ya kushangaza toka mshambuliaji wa kimataifa wa nchi hiyo anayecheza klabu ya Arsenal Park Chu-Young kuachwa katika kikosi cha timu hiyo katika mechi za kufuzu michuano ya Kombe la Dunia na kulazimika kuomba msamaha kwa kuchelewa kujiunga na jeshi na kuchukua uraia wa Monaco.

Akihojiwa kuhusiana na suala hilo, Kocha wa timu hiyo Hong Myung-Bo alikiri kuwa ni kweli kama wakipata medali ya shaba ya kushika nafasi ya tatu katika michuano hiyo wachezaji watapata msamaha wa kwenda jeshini kitu ambacho ni lazima kwa raia yoyote kwa Korea Kusini. Kocha huyo aliendelea kusema kuwa suala hilo halina umuhimu sana kwani madhumuni yao makubwa ni kuifunga Japan na kuwapa furaha mamilioni ya mashabiki watakaokuwa wkiwatizama huko nyumbani. Japan imewahi kutwaa medali ya shaba katika michuano ya olimpiki iliyofanyika jijini Mexico City mwaka 1968 na wamepata nafasi hiyo tena dhidi ya mahasimu wao Korea Kusini baadae leo mchezo ambao unatarajiwa kuwa mkali na kusisimua.